You are here
Home > प्रवास > भारतको उत्तरप्रदेशमा भीषण हावाहुरी, १९ जनाको मृत्यु, ४८ घाइते

भारतको उत्तरप्रदेशमा भीषण हावाहुरी, १९ जनाको मृत्यु, ४८ घाइते

२४ जेष्ठ २०७६, शुक्रबार १८:१४

भारतको उत्तर प्रदेश राज्यमा बिहीबार साँझ आएको वर्षासहितको हावाहुरी र चट्याङका कारण १९ जनाको मृत्यु हुनुका साथै ४८ जना घाइते भएका छन्।

उत्तर प्रदेशका राहत उद्धार आयुक्त जी एस प्रियदर्शीले राज्यका १२ वटा जिल्ला नराम्रोसँग प्रभावित भएको जानकारी दिँदै आँधी र चट्याङका कारण १९ जनाको ज्यान गएको खबर प्राप्त भएको बताए। उनले आँधी प्रभावित जिल्लाहरुमा राहत र उद्धारको कार्य जारी रहेको पनि जानकारी दिए।

आँधीबाट प्रदेशका मैनपुरी, कासगन्ज, एटा, आगरा, रामपुर, बदायु र पिलिभित सबैभन्दा बढी प्रभावित भएका छन्। स्थानीय सञ्चार माध्यमका अनुसार चट्याङका साथै रुख र पर्खालहरु ढलेर मानिसको मृत्यु भएको छ। आँधीबाट ठूलो संख्यामा घरपालुवा पशुपक्षी पनि मरेका छन्।

आँधी प्रभावित क्षेत्रमा भएको जनधनको क्षतिको विवरण संकलन गर्ने कार्य जारी रहेको स्थानीय प्रशासनले जनाएको छ।
बिरामीहरुलाई उपचारकलागी अस्पताल पुर्याएको बुझ्न आएको छ ।