कपिलवस्तु स्थानीय प्रशासनले मंगलबार बिहान ५ बजेबाट कपिलवस्तुमा पूर्णरुपले लक डाउन गरेको छ । समुदाय स्तरमा कोरोना संक्रमण बढ्न थालेपछि प्रमुख जिल्ला अधिकारी दिर्घ नारायण पौडेलेको अध्यक्षतामा बसेको बैठकले यस्तो निर्णय गरेको हो ।
जिल्लामा ८ सय ५८ जनामा कोरोना पुष्टि भइसकेको र यो संख्या अझै बढ्न सक्ने र त्यसबाट कोरोना संक्रमणको अवस्था भयावह हुन सक्ने भन्दै यस्तो लक डाउन गर्नु परेको जिल्ला प्रशासन कार्यालयले जनाएको छ । जिल्ला प्रशासन कार्यालयका अनुसार २७ गते मंगलबार बिहान ५ बजे देखि ३२ गते राती १२ बजे सम्मलाई पूर्ण रुपमा लकडाउनको घोषणा गरेको छ ।
मेडिकल, पानी, दूधजस्ता वस्तुबाहेक सबै पसल व्यवसाय बन्द गर्ने निर्णय गरेको छ । उद्योग तथा कलकारखानाको भने स्वास्थ्य मन्त्रालयले जारी गरेको स्वास्थ्य निर्देशिका अनुसार सुरक्षाको सर्तकता अपनाएर संचालन गर्न सकिने जनाएको छ ।
दमकल, एम्बुलेन्स, शव बाहन, दूध, खानेपानीका गाडीहरु बाहेक अन्य सवै निजी तथा भाडाका सवारी साधानहरु संचालनमा पूर्ण रोक लगाईएको छ । राजमार्ग भएर गुड्ने सवारीसाधनहरु भने जिल्लामा नरोकिने गरी चल्न पाउने छन् ।
अत्यावश्यक समान खरिद गर्नका लागि हरेक दिन बिहान ८ बजेदेखि १० बजे सम्मको समय तोकिएको जिल्ला प्रशासन कार्यालयले जनाएको छ ।
